شعر پار و پیرار از استاد گرانقدر فرهود جلالی کندلوسی
پار و پیرار
امسال اگر كمى سِرى پارِ وَشنى رِه ياد نكن
وقتى تِه لينگ چكمه دَره لينگ تلى رِه ياد نكن
اگر راحتتر مجنى پارِ سختى رِه ياد نكن
وقتى ماشينّه گاز دِنى پياده مجی رِه ياد نكن
آسفالت دنده 4 شونى جاده خاكى رِه ياد نكن
وقتى شونى ويلا پيش باغبونى رِه ياد نكن
آلو طلايى ره بخر تِرش هلى رِه ياد نكن
اتومبیل سوار بونی چاودارى رِه ياد نكن
وچيله ره انام دنى رسن سرى رِه ياد نكن
چراغ فندك تِه دس دره چراغ موشى رِه ياد نكن
پيمانكار شهرى بئى شه قراری رِه ياد نكن
اره موتورى ره بدى تور و چلى رِه ياد نكن
ته وضع خوبه ارباب بئى شه رعيتى رِه ياد نكن
باد كه به غبغب انگنى شه پنچرى رِه ياد نكن
ته دس اگر كار بر انه شه كارسازى رِه ياد نكن
چار شايى پول ته جيف دره شه فقيرى رِه ياد نكن
چار نفر رييس بئى مهربونى رِه ياد نكن
اگر د تا ره مز دنى شه مزگيرى رِه ياد نكن
چار تا كلاس سواد دارنى شه اتته چى رِه ياد نكن
چارتا غريب ره كه بدى شه محلى رِه ياد نكن
خويش و قوم ره غربت بدى احوالپرسى ره ياد نكن
زوون خارج ياد بئير مازرونى رِه ياد نكن
مارك و دلار ته جيف دره يك قرانى رِه ياد نكن
حسابدار شركت بئى ميرزاگرى رِه ياد نكن
مهندس زرعت بووش ورزگرى رِه ياد نكن
جبر و مثلثات بخون قرآن خونّى رِه ياد نكن
امسال اگر عاقل بئى پار خلى ره ياد نكن
چارتا عاقل ته دور دره گج رفق رِه ياد نكن
پير سرى توبه كنى شه جوونى رِه ياد نكن
شومينه گازى روشن کرنی كله دى رِه ياد نكن
پيتزا تنورى كه خرنى بچا بشتى رِه ياد نكن
وقتى خرنى فيله و رون قرمه و پى رِه ياد نكن
اگر ته ديم سرخى بزو پار زردى رِه ياد نكن
گيتار و تاره ياد بئير شه پس پسى ره ياد نكن
وقتى كه جاز گوش كنى شه اميرى رِه ياد نكن
تهرون بن ره لو شونى محله سى رِه ياد نكن
هر كجه خانى دور بزن كراد زمى رِه ياد نكن
وقتى زن و خنه دارنى شه عزبى رِه ياد نكن
خاخر بلوز شلوار نه مج شه روسرى رِه ياد نكن
اداره شونى كار سر وچه و شى رِه ياد نكن
د شو كه شوم بيرون خرنى شه آشپزى رِه ياد نكن
لوه دارنى ديگ نچسب مرس و قلى رِه ياد نكن
لباس که چمدون كنى شه دیونى رِه ياد نكن
